Noboos disido iti di ontok pinopotimpuun Kalamazan Krismas om Toun Vagu 2010, id Hintuun Tonini Kampung Bokok/Kituau, Penampang, nazu do Komuniti Bestari miampai sokodung do Kotinanan Kobuuon om Koumohigan Kampung (JKKK) Kampung Bokok/Kituau, di sodop tadau Koonom nakatahib.

Ka disido, dati do kivaa projik kotundaan di pobuzuon di au songkuo koontok ginavo do mogigizon, miaga toi do projik kopoingkavasan ningkokoton talun-alun tu momoguno iho do hivang tana di ahaab.

“Mantad diho do pointantu no do kopogompit tana do mogigizon do akakib toi avazaan montok manaak lahan kopoonjulan doid projik nokomoi, om iho momoguno kozo do koundunan dotokou.

“Poingkuo po diho, savi avi diti nopo nga montok kounalan do mogigizon diho sondii om sinakagon ngaavi dotokou,” ka disido.

Ka di Donald, kotundaan nopo ngaavi di pobuzuon do boogizan kopolintaan kumaa id kokompungan nga montok popotounda koumatan di kaanu popohumis lahan kumaa doid sinakagon ngaavi di mikot.

Miaga po toi do sikul ka disido, mositi no o boogizan polinta do mogium hivang tana montok posumpakan do hinominon sikul, om mantad diho do momoguno koundunan ngaavi dotokou do popotumbozo do kotos montok kapanaon do projik nokomoi.

Donald, isido ponogi i Puu Hintuun Koundangan Pogun (Adun) Moyog, poingkuo po nga miboos do okon ko mogumpadan nogi o polinta doid kotos dotokou, kivaa ponimbangan do kopolintaan di misudong montok panampaping do kotos dotokou di nogompitan do projik ngaavi miaga diho, ka disido.

“Ahansan zou do songian kivaa projik di pobuzuon do kopolintaan di popogompit kotos dotokou do kaanu tokou manaak sokodung om kopogovit piumpongozan di tohumis di kapanaak kounalan kumaa doid songovian,” ka disido.

Kokomoi do ahal di aantakan do babaino, iho nopo nga kinaantakan ponginaman monutud panambazangan id Semenanjung, dati nontodonon au kasantaban ginavo binuzu kinoputusan do Kuut Takavas Kuala Lumpur di papavasa pomogunaan boos “Allah” id kapaabalan “The Herald”, minokianu isido do mogigizon ngaavi mooi do tumonoonong om au asabi ginavo.

“Otumbazaan zou do zotokou do doiti id pogun Sabah do kivaa pilotian om pihumaagan di tapantod id tatanga momoomogun di nosizun tinau, koubasanan om ugama. Poingkuo po diho nga mositi tokou do tumihombus papapantod pilotian om pihumaagan om au ovit-ovit do mimang koimaan di au kopogovit kounalan diho.

“Ahal miaga diti au kavasa do pogogozoon dotokou tu kivaa do boogizan di monoguvang ahal diho, om nunu i apatut do maan nopo nga miampai sumambayang kozo tokou doid Tuhan Kinoingan mooi do ouhanan o ahal diti tosisikap miampai kahansanan do kapanaak kovosian om kosontoban ginavo kumaa doid savi avi boogizan,” ka disido.